"2021" - പൊളിറ്റിക്കൽ ഇസ്‌ലാമിന്റെ സുഗമലക്ഷ്യപ്രാപ്തിയ്ക്ക് വേണ്ടി വഴി വെട്ടുന്നവരെ കരുതിയിരിക്കുക.

2021, കേരളത്തിൽ പൊളിറ്റിക്കൽ ഇസ്‌ലാമിനെ സംബന്ധിച്ചിടത്തോളം അതിപ്രധാനമായ ഒരു വർഷമാണ്. 1921ൽ "സ്വതന്ത്ര മാപ്പിളസ്ഥാൻ" സ്ഥാപിക്കുക എന്ന ലക്ഷ്യത്തിൽ ജിഹാദിഭീകരതയുടെ സകലക്രൂരതയും പുറത്തെടുത്തുകൊണ്ടു നടപ്പിലാക്കിയ ആക്രമണത്തിന് അതിന്റെ പ്രഖ്യാപിതലക്ഷ്യം അതേ അർത്ഥത്തിൽ നേടിയെടുക്കാൻ കഴിഞ്ഞില്ലാ എങ്കിലും അത് പൊളിറ്റിക്കൽ ഇസ്‌ലാമിനെ സംബന്ധിച്ചിടത്തോളം വൻവിജയം തന്നെയാണ്. അതിന്റെ നൂറാം വർഷമായ 2021ൽ അവർ പ്രകടമായി ലക്ഷ്യമിടുന്നത് എന്താണെന്ന് ഏകദേശധാരണയോടെ കേരളസമൂഹത്തിനോട് - മറ്റൊരു ഉദ്ദേശത്തിൽ ആണെങ്കിലും - വിളിച്ചു പറഞ്ഞത് ശ്രീ. പിണറായി വിജയൻ ആണ്. കേരളത്തിൽ മുസ്ലിം മുഖ്യമന്ത്രി അഥവാ 'മുഖ്യമന്ത്രിതുല്യൻ' ഉണ്ടാവുക എന്നതാണ് ഏറ്റവും തെളിഞ്ഞു കാണുന്ന പൊളിറ്റിക്കൽ ഇസ്ളാമിന്റെ ലക്ഷ്യം എന്നത് ഇന്ന് ഏവർക്കും ബോധ്യമായിക്കഴിഞ്ഞു. മുസ്ലിം സമൂഹത്തിൽ ജനിച്ച ഒരു വ്യക്തി മുഖ്യമന്ത്രി ആകുക എന്നല്ല 'മുസ്ലിം മുഖ്യമന്ത്രി' എന്നത് കൊണ്ട് പൊളിറ്റിക്കൽ ഇസ്ലാം ഉദ്ദേശിക്കുന്നത്. ദാറുൽ ഇസ്‌ലാമിന് വേണ്ടി അധികാരവും ബുദ്ധിയും ഉപയോഗിക്കുവാൻ സന്നദ്ധതയുള്ള ഒരാൾ മുഖ്യമന്ത്രി ആകുക എന്നതാണത്.
 'മുസ്ലിംമുഖ്യമന്ത്രി' എന്ന പൊളിറ്റിക്കൽ ഇസ്‌ലാമിന്റെ ലക്ഷ്യം  താരതമ്യേന വെളിവാക്കപ്പെട്ടതും ചെറുതുമാണ്. എന്നാൽ ഇതിനേക്കാൾ ഗൗരവതരം ആണ് പരസ്യമാക്കപ്പെടാത്ത അധികാരപരമായ ലക്ഷ്യങ്ങളും  അതുവഴിയുള്ള മതഅജണ്ടകളും. 

പൊളിറ്റിക്കൽ ഇസ്ലാം എന്നത് കൊണ്ട് എന്താണ് ഉദ്ദേശിക്കുന്നത് എന്ന പൊതുധാരണയിൽ നിന്നും ഇടതുചിന്തകരുടെ ആഖ്യാനങ്ങളിൽ നിന്നും മാറി നടന്നു ചിന്തിച്ചാൽ മാത്രമേ സമകാലികസംഭവങ്ങളുടെ ഗൗരവം പിടികിട്ടുകയുള്ളൂ. കാലങ്ങളായി ഉയർത്തുന്ന ചില സാങ്കേതികസമസ്യകളിൽ ചർച്ചകളെ തളച്ചിടുകയാണ്
പൊളിറ്റിക്കൽ ഇസ്‌ലാമിനെ നിർവചിക്കുന്നവരും വിശദീകരിക്കുന്നവരും  പതിവായി ചെയ്തുപോരുന്നത്. "പൊളിറ്റിക്കൽ ഇസ്ളാമിനോട് സമരസപ്പെടണം" എന്ന് ആഹ്വാനം ചെയ്യുന്ന ഇടതുപക്ഷ ബുദ്ധിജീവികളും പൊളിറ്റിക്കൽ ഇസ്ലാം വേരുറപ്പിച്ചിരിക്കുന്ന അടിസ്ഥാനആശയഭൂമിക "ദാറുൽ ഇസ്ലാം" ആണെന്ന കാര്യം സൗകര്യപൂർവം മറച്ചു പിടിക്കുകയാണ്. ചിലർ കേരളത്തിൽ ജമാഅത്തെ ഇസ്ലാമിയുടെ മറുപേരായി മാത്രം പൊളിറ്റിക്കൽ ഇസ്ലാമിനെ പരിമിതപ്പെടുത്തുന്നു. മറ്റു ചിലർ ഇതര 'ഇസ്ലാമിക് പ്യൂരിറ്റൻ (?)' ആശയധാരകളെക്കൂടി കൂടെ ചേർത്തു പഠിക്കുന്നു. സാധാരണക്കാർ മുസ്ലിം ലീഗ്, പോപ്പുലർ ഫ്രണ്ട് തുടങ്ങിയ സംഘടനകളേയും ഇവരുടെയൊക്കെ 'രാഷ്ട്രീയ ഇടപെടലു'കളേയും ആണ് പൊളിറ്റിക്കൽ ഇസ്ളാം ആയി വായിച്ചെടുക്കുന്നത്. കക്ഷി രാഷ്ട്രീയത്തിലെ ഇടപെടലുകൾ എല്ലാം നടത്തുന്നത്  പൊളിറ്റിക്കൽ ഇസ്ലാമിന്റെ താത്പര്യത്തിനു വിധേയമായിട്ടാണെങ്കിലും 'ഇസ്ലാമിക സംഘടന'കളുടെ കക്ഷിരാഷ്ട്രീയത്തിലെ ഇടപെടൽ ആണ് 'പൊളിറ്റിക്കൽ ഇസ്ലാം' എന്ന 'കാഴ്ച' അബദ്ധമാണെന്ന് പറയേണ്ടതില്ലല്ലോ. 
ദാറുൽ ഇസ്ലാം - അജണ്ടയിൽ ഊന്നിയ വിവിധ 'പ്രായോഗിക ശൈലികളുടെ' സങ്കലിതസ്വരൂപമായി തന്നെ പൊളിറ്റിക്കൽ ഇസ്‌ലാമിനെ വിലയിരുത്തണം. ഇതിന്റെ പ്രകടിതരൂപം എന്ന നിലയിൽ മത മൗലീകവാദസംഘടനകൾ മാത്രമല്ല. വിവിധ മേഖലകളിൽ പ്രവർത്തിക്കുന്ന വ്യക്തികൾ, രാഷ്ട്രീയവും രാഷ്ട്രീയേതരവുമായ പ്രഖ്യാപിതസ്വഭാവങ്ങളോട് കൂടിയ  സംഘടനകൾ ഇവയും പൊളിറ്റിക്കൽ ഇസ്ലാം എന്ന വ്യവഹാരപരിധിയിൽ ഉൾച്ചേരേണ്ടവയാണ്. ഇവർക്ക് ഇടയിൽ കോ - ഓർഡിനേഷൻ ഇല്ല എന്ന വാദം വസ്തുതാവിരുദ്ധവും വഴി തെറ്റിക്കാൻ ഉദ്ദേശിച്ചുള്ളതുമാണ് എന്ന് ആദ്യമേ പറഞ്ഞുകൊള്ളട്ടെ. 

ഇന്ന് പൊളിറ്റിക്കൽ ഇസ്ലാം സ്വാധീനം ചെലുത്താത്ത രാഷ്ട്രീയസംഘടനകളോ അധികാരകേന്ദ്രങ്ങളോ ഇല്ല എന്നു തീർത്തും പറയാവുന്നതാണ്. മിക്ക രാഷ്ട്രീയ പാർട്ടികളുടെയും രാഷ്ട്രീയഅജണ്ടകൾ തീരുമാനിക്കുന്നത് പൊളിറ്റിക്കൽ ഇസ്ലാം നേരിട്ടോ അതിനെ പ്രീണിപ്പിക്കുവാൻ ഉദ്ദേശിച്ചോ അതിന്റെ 'സാമ്പത്തികമടക്കമുള്ള' കെണികളിൽ വീണ നേതാക്കളുടെ പിടിവാശിയിലോ ആണ് എന്നതാണ് വാസ്തവം.
 കോൺഗ്രസ് പാർട്ടിയുടെ ജമാഅത്തെ ഇസ്ലാമി ബാന്ധവം, 'മുസ്ലിംലീഗ് തയ്യാറാക്കി കോൺഗ്രസ് ഹൈക്കമാന്റിന് നൽകിയ നിർദേശങ്ങൾ' ആണ് KPCC യിൽ നടക്കുന്ന നേതൃത്വമാറ്റങ്ങളുടെ അടിസ്ഥാനം എന്നിങ്ങനെയുള്ള വാർത്തകൾ നിദർശനമെന്നോണം ശ്രദ്ധിക്കാവുന്നതാണ്. 
കോൺഗ്രസ്സിൽ ഇക്കാര്യം പ്രകടമായി നടപ്പാക്കപ്പെടുമ്പോൾ ഇതരകക്ഷികളിലും അധികാരകേന്ദ്രങ്ങളിലും 'പൊളിറ്റിക്കൽ ഇസ്ലാമിന്റെ മാസ്റ്റർ ബ്രയിനുകൾ' ആയവരാൽ വിലക്കെടുക്കപ്പെട്ട ചില 'വഴിവെട്ടികൾ' ഇതിനു ചുക്കാൻ പിടിക്കുന്നു. സ്വന്തം ആശയധാരകളേയും പ്രസ്ഥാനങ്ങളേയും മൂല്യങ്ങളെയും അണികളേയും കബളിപ്പിച്ചും ചതിച്ചും പൊളിറ്റിക്കൽ ഇസ്‌ലാമിന്റെ 'വഴി വെട്ടികൾ' ആയി വേഷം കെട്ടാൻ ഇത്തരക്കാർക്ക് ലജ്ജയേതുമില്ല തന്നെ. 
ഇത്തരം നീക്കങ്ങൾ വിമർശനവിധേയമാകുമ്പോൾ തന്റെ പ്രവർത്തികൾ എല്ലാം 'രാഷ്ട്രീയ അടവുനയ'മായി വ്യാഖ്യാനിക്കാനുള്ള മെയ്‌വഴക്കം ആണ് ഇവരുടെ "കരുത്ത്". 
ഇവരുടെ വ്യക്തിപരമായ 'ആസ്തിക്കണക്കുകൾ' ഇവരുടെ വാദഗതിയുടെ പൊള്ളത്തരം വെളിവാക്കുന്നു എന്നതാണ് മറ്റൊരു നഗ്‌നമായ സത്യം. 
നിൽക്കക്കള്ളിയില്ലാതായാൽ തന്റെ പ്രസ്ഥാനങ്ങൾക്കോ അതിന്റെ നേതൃത്വത്തിനോ അതുമായി ബന്ധപ്പെട്ട സ്ഥാപനങ്ങൾക്കോ "സഹായപ്രവാഹ"മായി സാഹചര്യങ്ങളെ സമരസപ്പെടുത്തുന്ന കൗശലവും വഴിവെട്ടികൾ പ്രകടിപ്പിക്കും. 
മിക്കവാറും എല്ലാ സംഘടനകളും പെട്ടുപോകുന്ന "ലോബിയിങ്" ആണിത്. 
നേരത്തേ സൂചിപ്പിച്ച പോലെ പൊളിറ്റിക്കൽ ഇസ്ളാമിന്റെ കടന്നുവരവ്, പൊളിറ്റിക്സിലൂടെ മാത്രമല്ല. ഇന്ന് അത് കൈവെക്കാത്ത മേഖലകൾ ഇല്ല തന്നെ. ഇസ്ളാംഇതര മതസംവിധാനങ്ങളുടേയും അതിൽപ്പെട്ട വ്യക്തികളുടേയും മേലുള്ള 'കയ്യേറ്റം' എന്നതോടൊപ്പം
പൊളിറ്റിക്കൽ ഇസ്ളാമിന്റെ പ്രധാനമുഖമുദ്ര അതിന്റെ രാഷ്ട്രവിരുദ്ധത തന്നെ ആണ്.
അതുകൊണ്ട് തന്നെ ബോധപൂർവമായ രാഷ്ട്രവിരുദ്ധപ്രവർത്തനവും നിയമലംഘനവും ഒളിഞ്ഞും തെളിഞ്ഞും ഇവർ പ്രോത്സാഹിപ്പിക്കുന്നുണ്ട്. അത് രാഷ്ട്രവിരുദ്ധ ആശയ പ്രചാരണം തൊട്ട് വിഘടനവാദം, സ്വർണക്കടത്ത്, ആയുധക്കടത്ത്, മയക്കുമരുന്ന് കടത്ത് തുടങ്ങി നാടിനോട് നേരിട്ടു യുദ്ധം പ്രഖ്യാപിക്കുന്ന തലം വരെയും ചെന്നെത്തുന്നതാണ്. പൊളിറ്റിക്കൽ ഇസ്‌ലാമിന്റെ അജണ്ടാ പൂർത്തീകരണത്തിനുള്ള സാമ്പത്തികസമാഹരണം സ്വർണക്കടത്ത് പോലുള്ള രാജ്യദ്രോഹപ്രവൃത്തികളിലൂടെ ആണ് എന്നുള്ളതും ശ്രദ്ധിക്കേണ്ടതുണ്ട്.
ഏതെങ്കിലും സാഹചര്യത്തിൽ പിടിക്കപ്പെട്ടാൽ പൊളിറ്റിക്കൽ ഇസ്ളാമിന്റെ പതാകാവാഹകരും മേൽ പരാമർശിക്കപ്പെട്ട വഴിവെട്ടികളും എല്ലാം ചേർന്ന് 'മാനുഷീകനിയമ'ത്തിനു വിട്ടു കൊടുക്കാതെ 'രക്ഷ'പ്പെടുത്തിയെടുക്കുകയും ചെയ്യും. നൂറുകണക്കിന് സംഭവങ്ങളിലൂടെ ഇക്കാര്യം വിലയിരുത്തുവാൻ കഴിയും.
ഇത്തരം രാഷ്ട്രവിരുദ്ധ പ്രവർത്തനങ്ങളിൽ ശബ്ദമുയർത്തുന്ന പ്രസ്ഥാനങ്ങളേയും വ്യക്തികളേയും നിർവീര്യരും നിശ്ശബ്ദരുമാക്കുവാൻ 'ആഭ്യന്തരമായ വഴിവെട്ടി'കളെ സമർഥമായി ഉപയോഗിക്കുവാൻ കഴിയുന്നു എന്നത് സമകാലിക കേരളത്തിലെ പൊളിറ്റിക്കൽ ഇസ്ലാമിന്റെ 'അജയ്യത' ഉറപ്പു വരുത്തുന്നു. ചുരുക്കത്തിൽ പൊളിറ്റിക്കൽ ഇസ്ളാമിന്റെ കടന്നുവരവ് അനായാസവും പ്രതിരോധരഹിതവും ആക്കിത്തീർക്കുന്നതിൽ വലിയൊരു പങ്ക്  സാമ്പത്തികമടക്കമുള്ള നേട്ടങ്ങൾക്കുവേണ്ടി 'ആരോടും വിവേചനമില്ലാതെ' കുറ്റവാളികളെ രക്ഷപ്പെടുത്തുന്ന രാഷ്ട്രീയ - അധികാര "കേന്ദ്ര"ങ്ങൾക്ക് ഉണ്ട് എന്നതാണ് വാസ്തവം.

1921 ന്റെ നൂറാം വാർഷികത്തിൽ പൊളിറ്റിക്കൽ ഇസ്ലാം അതിന്റെ "രാഷ്ട്ര"സംബന്ധിയായ അജണ്ടയിലേക്ക് നടന്നടുക്കുമ്പോൾ 1921 ലെ ബാധിതജനതയായ ഹിന്ദുസമൂഹം തന്നെ ആണ് ഇന്നും ബാധിതമായി മുന്നിൽ നിൽക്കുന്നത്. 1921ന്റെ ചരിത്രത്തെ തന്നെ അന്യഥാവൽക്കരിക്കുന്ന വിവിധ ആഖ്യാനരൂപങ്ങളുമായി ജിഹാദിപ്രസ്ഥാനങ്ങൾ മുന്നോട്ടു പോകുന്നത് 'കേരളം പിടിച്ചടക്കുക' എന്ന ലക്ഷ്യത്തിലേക്കുള്ള പ്രയാണത്തിന് സമാന്തരവും സഹായകവുമായ നിരവധി പ്രവൃത്തികളിൽ ഒരു പ്രകാരത്തിൽ ഉള്ളത് മാത്രമാണ്. 
അതിനെ നോക്കിക്കാണേണ്ട ഗൗരവത്തിൽ തന്നെ  പരിഗണിക്കുകയും വേണം. ഇതിനു പ്രതിക്രിയ ആയോ സ്വതസിദ്ധമായോ
1921ന്റെ അനുസ്മരണങ്ങളും ചരിത്രവും സമുചിതമായി ആലേഖനം ചെയ്യപ്പെടുകയും കള്ളച്ചരിത്രങ്ങളെ ചോദ്യം ചെയ്യുകയും വേണം എന്നതിൽ തർക്കമൊന്നുമില്ല. 
എന്നാൽ അത്തരം ചരിത്രാലേഖനമോ  ജാഗരണപ്രവർത്തനങ്ങളോ ഹിന്ദുസമൂഹത്തിന്റെ ആത്യന്തികലക്ഷ്യമോ മാർഗമോ ആയി ചിത്രീകരിക്കുന്നത് ശരിയല്ല.
പൊളിറ്റിക്കൽ ഇസ്ലാമിന്റെ ആത്യന്തികഅജണ്ട 'ചരിത്രനിർമാണം' അല്ല. 
"കേരളം പിടിച്ചടക്കൽ" ആണ്.
2021- വർഷത്തേക്കുള്ള പൊളിറ്റിക്കൽ ഇസ്‌ലാമിന്റെ ഈ ആത്യന്തികഅജണ്ടയെ  പ്രതിരോധിക്കാനുള്ള  ധൈര്യപൂർണവും സത്യസന്ധവും ചടുലവുമായ കർമപദ്ധതികൾ കക്ഷിരാഷ്ട്രീയത്തിന്റെ ലാഭനഷ്ടക്കണക്കുകൾ പരിഗണിക്കാതെ ഉണ്ടാകേണ്ടതുണ്ട്. ഹിന്ദുസമൂഹത്തിന്റെ നിലനില്പ് അപകടത്തിലാക്കുന്ന രാഷ്ട്രീയ നിലപാടുകളേയും നേതാക്കളേയും തിരസ്കരിക്കാൻ കഴിയുമ്പോൾ മാത്രമേ ഈ ഭീഷണിയെ ഫലപ്രദമായി നേരിടാൻ കഴിയൂ. പാർട്ടികൾക്കോ രാഷ്ട്രീയനേതാക്കൾക്കോ ഉണ്ടാകുന്ന 'നേട്ടങ്ങൾ' ഹിന്ദുവിന്റെ നിലനില്പ് അപകടപ്പെടുത്തി ഉണ്ടാകുന്നതിനോട് യാതൊരു യോജിപ്പും ഇല്ല തന്നെ. 
പൊളിറ്റിക്കൽ ഇസ്ളാമിന്റെ അജണ്ടകൾ അനായാസം നടപ്പിൽ വരുന്നത്, ആവശ്യമുള്ള ഫണ്ട് സ്വർണക്കടത്ത് പോലുള്ള രാജ്യവിരുദ്ധ പ്രവർത്തനങ്ങളിലൂടെ സമാഹരിക്കപ്പെടുന്നത് കൊണ്ടാണ്. അത്തരം രാജ്യവിരുദ്ധ പ്രവർത്തനങ്ങളിലെ 'യഥാർത്ഥ വില്ലന്മാർ' സംരക്ഷിക്കപ്പെടുന്നു എന്നതിന്റെ അർത്ഥം പൊളിറ്റിക്കൽ ഇസ്ളാമിന്റെ സുഗമമായ ലക്ഷ്യപ്രാപ്തിയ്ക്കു 'ചിലർ' വഴിവെട്ടുന്നു എന്നു തന്നെ ആണ്. 
നേതാക്കളുടെ തുച്ഛമായ നേട്ടത്തിനുള്ള  ഈ 'വഴിവെട്ടലുകൾ' 'ചങ്കുവെട്ടി'കളിലേക്കുള്ളതാണ് എന്ന് ഹിന്ദുസമൂഹം തിരിച്ചറിയേണ്ടതുണ്ട്. 

2021 ലേക്കുള്ള പ്രയാണത്തിന്റെ ഭാഗമായി കേരളത്തിൽ സജീവമായി ജിഹാദി പ്രസ്ഥാനങ്ങൾ നിർബാധം നടത്തിക്കൊണ്ടിരിക്കുന്ന 'ലവ് ജിഹാദ്' വിഷയത്തിൽ ഹിന്ദുസമൂഹത്തിൽ നിന്നും സംഘടനകളിൽ നിന്നും നൂറുകണക്കിന് പരാതികൾ നൽകിയിട്ടുപോലും സത്യസന്ധമായ ഒരു അന്വേഷണമോ അടിസ്ഥാനനീതിയോ പോലും ലഭ്യമാക്കാൻ ഒരു സർക്കാരും  തയ്യാറാകാത്തത് എന്തുകൊണ്ടായിരിക്കും? 
സാധാരണഗതിയിൽ ഒരു പരാതി ലഭിച്ചാൽ തന്നെ അന്വേഷണത്തിന് ശുപാർശ ചെയ്യാൻ തയ്യാറാകേണ്ട ഭരണകൂടങ്ങൾ എന്തുകൊണ്ട് ആണ് നൂറുകണക്കിന് പരാതികൾ ഉയർന്ന ഇക്കാര്യത്തിൽ വിപരീതമായി പ്രവർത്തിക്കുന്നത്?  നൂറുകണക്കിന് കുടുംബങ്ങൾ ഇരകളായി തീ തിന്ന് ജീവിക്കുമ്പോഴും ഏത് അന്വേഷണത്തിന്റെ അടിസ്ഥാനത്തിൽ ആണ് 'കേരളത്തിൽ ലവ് ജിഹാദ്' ഇല്ല എന്ന് 'മന്ത്രിമാർ' നമ്മെ നോക്കി പരിഹസിക്കുന്നത്? 
നിരവധി ജിഹാദികൾ IS ൽ ചേർന്ന് അഫ്‌ഗാനിൽ പോയതടക്കമുള്ള നിരവധി സംഭവങ്ങൾ ഉള്ളപ്പോഴും കേരളത്തിൽ IS ഇല്ല എന്നു പറയുന്നതിന്റെ ചേതോവികാരം തന്നെ നിരൂഹ്യമായിരിക്കുന്നു. 
ഏതായാലും ഇതെല്ലാം ഹിന്ദുസമൂഹത്തെ ഉന്മൂലനം ചെയ്യുന്നതും ഹിന്ദുവിന് അടിസ്ഥാനനീതി നിഷേധിക്കുന്നതും പൊളിറ്റിക്കൽ ഇസ്‌ലാമിന്റെ പ്രയാണത്തിന്  മറ തീർക്കുന്നതുമാണ്. 
ചുരുക്കത്തിൽ കേരളത്തിൽ 2021 ലേക്കുള്ള പൊളിറ്റിക്കൽ ഇസ്ലാമിന്റെ അജണ്ടയിലേക്കുള്ള പടികയറ്റം  കുറ്റവാളികളെ രക്ഷപ്പെടാൻ സഹായിച്ചതിലൂടെ ഉണ്ടായി വന്നതാണ്. 'രാഷ്ട്രീയ കാരണ'ങ്ങളാൽ ഇനിയും ഇക്കാര്യങ്ങളിൽ കണ്ണടക്കാൻ ആണ് ഭാവമെങ്കിൽ 1921 ന്റെ ദുരന്തം കേരളക്കര ആകെ ആവർത്തിക്കുന്നത് വൈകാതെ കാണേണ്ടി വരും. 
- ഡോ: ഭാർഗവ റാം